En França, an lou Tour de França, e à Lîdje, an lou Tour de Lîdje!

La semana passada (doù dilun lou 18 de julhet fin au divendre), 192 ciclista van percourrut la prouvinça valouna : Blegny, Ans, Welkenraedt, Remicourt e soubretout Seraing… de noumque fan pas pantaià!

Aquest’ an èra lou 50e anniversari. 50 anada que tout lou mounde s’en bate e preferisse si faire un penec davant lou tour de França. Au mancou aquéu passa à la televisioun.

Lou girou es talamen pichin que soun coustrech de partì d’un luèc e de faire una blouca per revenì au meme luèc : Blégny-Blégny, proumiera tapa.

Sembla que lu gagnant doù Tour de Lîdje fan una bella carrièra. Ma ai cercat de noum celèbre en li arquiva doù tour, e ai ren trouvat. O bessai siéu just pas proun esperta en ciclisme.

Ma, pensi qu’es una bouona idea d’avè aquel evenimen, propre à la siéu regioun, meme se noun es un’especialità o una tradicioun.

Si poù meme imaginà un Girou de la Countea de Nissa !

E per lu fan doù Tour de França, saupès que parterà de Lîdje en lou 2012 !

Hélène Molinari